15/04/2025 17:08
《小傳日記》正當魚缸處於唔上唔落嘅危險狀態，都竟然仲有新股揀喺呢個時侯上市，仲要
係隻Ｂ仔股映恩生物（０９６０６）！但果然風頭火勢都敢掛牌係有啲底，結果全日較招股價高
收一倍有多，每手勁賺１１０４０元，掛牌第一日計升幅仲勁過集資王蜜雪（０２０９７）。
事實上１８Ａ條例以來都上過唔少Ｂ仔股，但普遍都令孖屐相當之有戒心，因為好多Ｂ仔股
上市未錄盈利，結果上完市一年又一年，都仍然係未錄盈利，商業化遙遙無期兼夾仲會配股發債
等等，都令孖屐非常失望。
結果今次映恩生物就為Ｂ仔股爭返口氣，超購１１４倍，以新股嚟睇倍數唔算特別大，但喺
近年Ｂ仔新股入面已經係好大，對上一次表現好啲已經要數到２０２１年上市嘅微創系微創機器
人（０２２５２），都係得嗰１５倍，咁就對比得到映恩係有幾咁勁。
睇返基本面搵吓映恩究竟勁喺邊度，據招股書睇到，映恩生物主要業務係偶聯藥物，即係同
藥明合聯（０２２６８）有啲類似，但映恩主要係自己研發為主而唔係ＣＸＯ，相反仲係會幫襯
ＣＸＯ公司，所以順理成章藥明生物（０２２６９）都係映恩嘅大股東之一，持股量５％，都應
該喺業務上會有幫助。映恩生物主要四大生產線，包括免疫毒素抗體（ＤＩＴＡＣ）、雙特異性
抗體（ＤＩＢＡＣ）、免疫調節抗體（ＤＩＭＡＣ）同獨特有效載荷抗體（ＤＵＰＡＣ），全部
都係針對偶聯藥嘅精細分支，而雖然管線多，但好重要一點係過去幾年都無做過融資，即係過去
三至四年入面嘅發展所需都係自給自足，呢一點係Ｂ仔股入面少見，都好大程度係引發孖屐追捧
嘅重要原因之一。
唔止咁，除咗藥明係上市前投資者，基石投資者方面都響噹噹，總共１５個重磅機構投資者
，例如ＢｉｏＮＴｅｃｈ、清池資本、易方達等等，都加強孖屐對於映恩嘅信心。數字方面，招
股書提到目前公司已達成嘅交易總額已經超過６０億美元，去到今年３月底就已經收到其中嘅大
約５億美元預付款，即係未來嘅商業化收益都傾向穩定，可以話一上市就甩Ｂ在望。
今日敲鑼後主席兼首席執行官朱忠遠喺上市儀式提到，最快出年會有第一款藥物商業化，更
加令孖屐期待之後嘅上市表現，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
| 